October 27. beaivi 2021

Sáhkavuorru podcasttas ilbmet ođđa sáddagat

Sámi allaskuvlla podcast Sáhkavuorru, mas prográmmajođiheaddjeguovttus Harald Gaski ja Per-Josef Idivuoma ságastallaba sámi dutkiiguin, almmuha dán čávčča vihtta ođđa sáddaga. Nu beasat ge oahpásnuvvat viđain dutkiin ja sin dutkanfáttáide mas sii ieža čilgejit sin bargguid sisdoalu, sin beroštumii dutkansuorgái ja makkár ávki lea sámi servodaga ovdáneapmái ja giela seailluheapmái diekkár bargguin. 

Podcasttas lea álkis giella ja sáhttá muhtomin ollu reaškkas maid. Nu lea dutkanfáddá loktejuvvon olggobeallái allaskuvlla luohkkálanjaid ja lea olamuttos maiddái olbmuide geat eai leat alit oahpahusa váldime. 

Helena Omma vuosttaš studioguossi dán čavčča
Vuosttaš sátta dán vuoro almmuhuvvo golggotmánu 27. beaivvi. Lea Sámi allaskuvlla doavttergrádastipendiáhtta Helena Omma gii áŋgirit muitala iežas miellagiddevaš dutkama das movt boazosámit ságastallet eatnamiid birra. Son čilge sáddagis oanehaččat mas son fuomášii dehálašvuođa dokumenteret man ollu árbevirolaš máhttu ja diehtu lea sámegielsániid sisdoalus, ja maid mii eat beaivválaččat oba jurddaš ge. Studios ságastallet maiddái masa dákkár dutkan sáhttá ávkin, omd. fuomášuhttit man dehálaš otná dilis lea seailluhit árbevirolaš máhtu ja sámegiela.

Njeallje sáddaga vel
Boahtte sátta Sáhkavuorru podcasttas almmuhuvvo boahtte vahkku. Čuovo fal mielde, ođđa fáddá ja ođđa studioguossi!