Kapihttal 7. Oahpuid sisaheiveheapmi

Ulbmil

Dokumeanta galgá sihkkarastit ahte olggobealde oahpuid dohkkeheami ja sisaheiveheami hálddašeamis lea alla kvalitehta.

Doaibmaguovlu

Dát dokumeanta guoská ollislaččat olggobealde oahpuid dohkkeheami ja sisaheiveheami hálddašeapmái Sámi allaskuvllas. Dokumeanta čilge oktasašvuođaid mat leat oassin dán barggus. Báikkálaš prosedyrat ja rutiinnat dása guoskevaš bargguide leat gávdnamis oahppohálddahusa siidduin.

Lágat ja njuolggadusat sisaheivehanáššiid hálddašeapmái

Čuovvovaš lágat ja njuolggadusat mearridit olggobealde oahpuid dohkkeheami ja sisaheiveheami hálddašeami Sámi allaskuvllas: 

Universitehta ja allaskuvlaláhka (Lov om universiteter og høyskoler)

Universitehta ja allaskuvlalága vuođul lea Nasjonalt organ for kvalitet i utdanningen (NOKUT) fágalaš bealátkeahtes stáhtalaš hálddašanorgána. NOKUT:a olgoriikka oahpuid ossodat (seksjon for utenlandsk utdanning) galgá earret eará oppalaččat dohkkehit olgoriikka alit oahpuid. NOKUT:a ovddasvástida maiddái listtu Krav til generell studiekompetanse for søkere med utenlandsk utdanning (GSU-listu). GSU-listtus boahtá ovdan makkár gelbbolašvuohta iešguđet riikkain deavdá oppalaš lohkangelbbolašvuođa gáibádusaid. GSU-listu lea bagadeaddjin NOKUTii olgoriikka alit oahpu oppalaš dohkkeheami oktavuođas Norggas.

NOKUT:a olgoriikka oahpu ossodat ovddasvástida maiddái gaskkustit dieđuid ásahusa mearrádusaid olgoriikka oahpuid dohkkeheami birra. Buot alit oahpu ásahusat Norggas galget registreret ohcamiid ja mearrádusaid juohke áššis mat gusket olgoriikka oahpu dohkkeheapmái Nasjonal database for godkjenning av utenlandsk høyere utdanningii (NAGii).

Universitehta ja allaskuvlalága vuođul galgá Sámi allaskuvla dohkkehit cevzojuvvon ovttadagaid, fágaid, eksámeniid dahje geahččalemiid eará universitehtain ja allaskuvllain, mat fállet akkrediterejuvvon oahpuid, seamma mađe oahppočuoggáiguin nu guhkas go dát devdet fágalaš gáibádusaid dihto eksámenii, grádii dahje ohppui Sámi allaskuvllas. Sámi allaskuvla meannuda ja mearrida ieš eaŋkilolbmuid ohcamiid mat gusket oažžut dohkkehuvvot eará alit oahpu fágalaččat vástideaddjin oahpuin maid Sámi allaskuvla fállá.  

Eará našunála ja internašunála konvenšuvnnat ja šiehtadusat main lea dadjamuš olggobealde oahpuid  dohkkeheami ja sisaheiveheami hálddašeapmái Sámi allaskuvllas:

Lisboa-konvenšuvdna

Lisboa-konvenšuvdna lea šiehtadus mii lea dahkkon UNESCO CEPES miellahttoriikkaid ja Eurohpáráđi gaskkas. Šiehtadus galgá láhčit dili stuorát akademalaš mobilitehtii guoskevaš riikkaid gaskkas. Lisboa-konvenšuvdna sisttisdoallá oahpuid sisaheivehan-/dohkkehanáššiid dohkkeheami ja buriid áššemeannudanrutiinnaid váldoprinsihpaid: kvalifikašuvnnaid, áššemeannudeami prinsihpaid, áššemeannudanáiggi, váidinvejolašvuođa ja diehtojuohkingeatnegasvuođa, alit ohppui beassama, oahppoáigodagaid, dohkkeheami bohtosiid, báhtareddjiid ja kvalitehtasihkkarastima. Áššemeannudanáiggi birra daddjo ahte dát ii berre leat guhkit go njeallje mánu dan rájes go buot relevánta dieđut leat boahtán ásahussii.

Bologna-deklarašuvdna

Bologna-deklarašuvdna geatnegahttá oasseváldiriikkaid bargat Eurohpá oahppovuogádagaid ovttasbarggu ja oktavuođaid nannemiin. Šiehtadusa deháleamos ulbmilat leat ovdánahttit grádastruktuvrra maid sáhttá buohtastahttit, oktasaš čuoggávuogádaga, bargat studeantamobilitehta hehttehusaid vuostá ja ásahit alit oahpu kvalitehtasihkkarastinvuogádagaid.

Norga lei okta dain riikkain mii ovddemus vuolláičálii Bologna-deklarašuvnna ja mii sisafievrridii čuoggávuogádaga mii lea ideanttalaš nu gohčoduvvon Credit Transfer System (ECTS) vuogádagain. ECTS lea standardiserejuvvon konverterenvuogádat mainna galgá sáhttit mihtidit, buohtastahttit ja fievrridit Eurohpá alit oahpu oahppodiimmuid, oahppočuoggáid ja árvosániid meari. Ovtta jagi ollesáiggioahppu lea meroštallojuvvon leat 60 oahppočuoggá = 60 ECTS ja vástida 1500-1800 oahppodiimmu. Árvosátnevuogádaga A-F (=Fail) vuođđun lea dihto luohká proseanttalaš árvosátnejuohku gaskkal buoremus ja heajumus olahusaid.

Reykjavik-julggaštus

Reykjavik-julggaštus lea davviriikkalaš šiehtadus 2004 rájes, mii guoská oahpuid oktasaš dohkkeheapmái. Šiehtadus sisttisdoallá oahppoáigodagaid, eksámeniid ja máŋgga davviriikka oahpu kombinerenvejolašvuođaid oktasaš dohkkeheami. Sullii seamma go Lisboa-konvenšuvdna.

Sisaheiveheamit – doahpagiid čielggadeapmi

Olggobealde oahpu dohkkeheapmi mielddisbuktá ahte olgoriikka oahppu dahje oahppu mii lea čađahuvvon priváhta oahppoásahusas Norggas sáhttá leat oassin dahje árvvoštallojuvvon vástideaddjin Norgga grádii. Akkrediterejuvvon oahppoásahusaid oahpuid hápmi ja sisdoallu leat eaktun ollislaš dohkkeheapmái dahje oassedohkkeheapmái. Earuhuvvo gaskkal oppalaš ja fágalaš dohkkeheami:

Oppalaš dohkkeheapmi mearkkaša ahte olgoriikka oahppu dahje oahppu muhtun priváhta allaskuvllas Norggas lea árvvoštallojuvvon leat dan dásis ahte sáhttá leat oassin grádas dahje vástidit gráda Norgga stáhtalaš alit oahppoásahusain. Oahpu viidodat oahppojagiid ja oahppočuoggáid mielde buohtastahttojuvvon universitehtaid ja stáhtalaš allaskuvllaid oahpuiguin árvvoštallojuvvo maiddái. Dákkár ohcamiid meannuda NOKUT.

Fágalaš dohkkeheapmi mearkkaša ahte olgoriikka oahppu dahje oahppu muhtun priváhta allaskuvllas Norggas árvvoštallojuvvo dihto fágaid ja grádaid ektui Sámi allaskuvllas. Árvvoštallan mearrida deavdá go oahppu fágalaš gáibádusaid nu ahte sáhttá sisaheivehuvvot grádii ja vejolaččat oanidit oahppoáiggi, dahje deavdá go spesifihkka gáibádusaid oahppoásahusa gráda govdodahkii ja čiekŋudeapmái.  

Olgoriikka oahpu ovdagihtiidohkkeheapmi lea dárbbašlaš go Sámi allaskuvlla studeanttat galget váldit oasi oahpus olgoriikkas.

Dohkkeheapmi mielddisbuktá ahte stáda alitoahppoásahusa oahppu dohkkehuvvo eará stádalaš alitoahppoásahusain áiggis-áigái-prinsihpa (tid-for-tid-prinsippet) mielde ja seamma oahppočuoggá loguin. Oahppočuoggáid ávkkástallan grádas ođđa oahppoásahusas eaktuduvvo grádanjuolggadusain ja árvvoštallojuvvo sierra ođđa oahppoásahusas.

Sisaheiveheapmi ja beassan

Jus muhtun studeanta háliida váldit eambbo oahpu seamma fágasuorggi siskkobealde go ovddit oahppu maid son lea váldán, de galgá olggobealde oahppu sisaheivehuvvot Sámi allaskuvllas muhtun ohppui ja dán vuođul vejolaččat addit vuođu beassamii. Dát mearkkaša ahte fágalaš sisdoallu čađahuvvon oahpus buohtastahttojuvvo sisdoaluin oahpus maid studeanta áigu váldit Sámi allaskuvllas. Eaktun sisaheiveheapmái lea ahte olggobealde oahppu lea fágalaččat dohkkehuvvon.

Sisaheiveheami boađus čájeha man muddui olggobealde oahppu sáhttá árvvoštallojuvvot leat vástideaddjin ovttadagaide Sámi allaskuvlla oahppoprográmmain. Jus čájehuvvo doarvái vástideapmi, de studeanta beassá oahppoprográmma guoskevaš oasis/osiin. Áššiin gos čájehuvvo ahte lea fágalaš latnjalasvuohta gaskkal olggobealde oahpu ja Sámi allaskuvllas muhtun oahppoovttadaga, galgá studentii addot unnideapmi oahppočuoggáin jus studeanta čađaha eksámena dán oahppoovttadagas. Unnideapmi hehtte studeantta oažžumis duppalit čuoggáid grádas oahpuin main lea seamma fágalaš sisdoallu, vrd. § 3-5 vuosttaš lađas universitehta ja allaskuvlalága. Praktihkalaččat mearkkaša dát ahte olggobealde oahpu dohkkehuvvon oahppočuoggámearri unniduvvo.

Olgoriikka oahpu dohkkeheapmi čuovvu dábálaččat seamma prosedyra go olggobealde oahpuid, mat leat čađahuvvon Norgga alit oahppoásahusain, dohkkeheapmi.

Ovddasvástádusjuohku sisaheivehanáššiid hálddašeamis

NOKUT ovddasvástida:

  • Meannudit eaŋkilolbmuid ohcamiid mat gusket dasa ahte galgá go olgoriikka oahppu oppalaččat dohkkehuvvot, nu ahte oahppu lea dási ja viidodaga ektui ovtta dásis Norgga akkrediterejuvvon alit oahpuin
  • Vástidit gažaldagaid maid Sámi allaskuvla ovddida dan ektui ahte vástida go olgoriikka oahppu Norgga alit oahpu
  • Addit dieđuid jus olgoriikka oahppoásahus ja oahppu lea akkrediterejuvvon alit oahppun
  • Kvalitehtasihkkarastit GSU-listtu.

Sámi allaskuvlla oahppohálddahus ovddasvástida:

  • Siskkáldasat koordineret fágalaš dohkkeheami/sisaheiveheami ohcamiid ja maiddái ohcamiid mat gusket fágain/oahpuin beassamii
  • Meannudit oahpposajiohcamiid eŋgelasgielat oahpuide ja áššemeannudit ohcamiid masteroahpuide. Oahppohálddahus koordinere vejolaš fágalaš árvvoštallamiid
  • Departemeantta dahje NOKUT:a diŋgojuvvon árvvoštallanbargguid
  • Doarjjan Ph.D oahpuid sisaváldimis
  • Koordineret ja meannudit báhtareddjiid oahpposajiohcamiid main leat váilevaš duođaštusat.

Fágagoađit ovddasvástidit:

  • Fágalaččat árvvoštallat ohcamiid mat gusket oahpuid dohkkeheapmái/sisaheiveheapmái/beassamii
  • Fágalaččat doarjut sisaváldinlávdegotti ja oahppohálddahusa oahpposajiohcamiid meannudeamis.

Dutkan- ja oahppostivra ovddasvástida:

  • Meannudit ohcamiid mat gusket  oahpuid, sihke olgoriikka ja Norgga, fágalaš dohkkeheapmái ja sisaheiveheapmái, ja maiddái ohcamiid mat gusket fágain/oahpuin beassamii. Olgoriikka oahpu dási ja viidodaga mearrideamis galgá NOKUT:ain ráđđádallojuvvot

Áššemeannudeapmi

Áššemeannudeaddji ferte dárkkistit ahte oahpuid sisaheiveheami ja dohkkeheami ohcamis leat doarvái dieđut ja buot duođaštusat fárus ovdal ohcamat sáhttet meannuduvvot. Ohcci galgá duođaštit olggobealde oahpu oahppoduođaštusaid ja árvosátnečállosiid duođaštuvvon kopiijaiguin. Lassin galgá ohcci muitalit makkár oahpuid áigu čađahit Sámi allaskuvllas ja duođaštit olggobealde oahpu fágalaš sisadoalu (omd. oahppo-/fágaplánain, lohkanmeriin). Sámi allaskuvlla skovvi fágaid sisaheiveheapmái/beassamii lea hábmejuvvon dainna lágiin ahte sihkkarastojuvvo ahte ohcci buktá dárbbašlaš duođaštusaid (geahča skovi Ohcanskovvi fágaid sisaheiveheamis/ -beassamis).

Jus duođaštusat váilot, de galgá ohcci ieš háhkat ja buktit dán ovdal ášši sáhttá meannuduvvot. Áššemeannudeaddji sáhttá muhtun earenoamáš diliin doarjjan duođaštusaid háhkamis. Alit oahppoásahussii sáhttá leat arvat álkit oažžut duođaštusaid go eaŋkilolbmui, ovdamearkka dihtii jus lea sáhka duođaštusain maid oahppoministeriijain. Áššemeannudeaddji sáhttá maiddái NOKUT:a ráđđádallamiin oažžut dárbbašlaš dieđuid áššis.  Ávžžuhuvvo ahte áššemeannudeaddji ohcá NAG:as, iskan dihte leatgo eará Oahppoásahusat árvvoštallan vástideaddji oahpu.

Fágalaš dohkkeheapmi ja sisaheiveheapmi

Fágalaš dohkkeheapmi ja sisaheiveheapmi mearkkaša ahte olggobealde oahpu ja Sámi allaskuvlla vástideaddji oahpu fágalaš sisdoallu ja dássi buohtastahttojuvvo detáljadásis. Dán barggu berre čađahit muhtun geas lea gelbbolašvuohta guoskevaš fágasuorggis, dábálaččat muhtun guoskevaš oahpu fágagoađis. Dábálaš áššegeaidnu lea ahte áššemeannudeaddji ovddida oahpu sisaheivehan/dohkkeheami ohcama oktan duođaštusaiguin fágalaš árvvoštallamii fágagoađi jođiheaddji bokte, gii nammada olbmo gii árvvoštallá ášši fágalaččat. Fágalaš árvvoštallama vuođul ovddida áššemeannudeaddji ášši, oktan mearrádusárvalusain, Sámi allaskuvlla dutkan- ja oahppostivrii mearrideapmái.

Dávjá lea olles dahje oassi guoskevaš oahpus ovdal sisaheivehuvvon Sámi allaskuvlla oahpuide. FS:s sáhttá oaidnit makkár sisaheivehanáššit leat meannuduvvon ja mo dáin lea boađus. Jus guoskevaš oahppu lea sisaheivehuvvon seamma ohppui ovdal, de sáhttá áššemeannudeaddji ieš meannudit ášši dán ášši vuođul. Go sihke olggobealde oahppu ja Sámi allaskuvlla fágat/ovttadagat/oahput sáhttet leat rievdan maŋemus dohkkeheami/sisaheiveheami maŋŋel, de berre áššemeannudeaddji leat várrogas ja árvvoštallat ášši vuđolaččat.  

Muhtun studeanttat ohcet sisaheiveheami/dohkkeheami máŋgii. Dán dihte berre áššemeannudeaddji álo dárkkistit leago ohcci ožžon osiid oahpus/oahpu dohkkehuvvot/sisaheivehuvvot ovdal. FS:s leat eanas áššit registrerejuvvon, muhto sihkarvuođa dihte berre maiddái guoskevaš studeantta studeantamáhppa elektrovnnalaš vuorkkás dárkkistuvvot.

Ovdagihtiidohkkeheapmi

Lonohallanstudeanttat geat mannet olgoriikii dárbbahit oažžut ovttadagaid maid plánejit studeret lonohallanáigodagas dohkkehuvvot ovdalgihtii. Dákkár ovdalgihtiidohkkeheapmi gáibiduvvo go Loatnakássas galgá ohcat doarjaga olgoriikka oahpuide. Sisaheiveheapmi galgá čielggaduvvon ovdalgihtii go ohccit váldet oahpu olgoriikkas mii lea vástideaddjin Sámi allaskuvlla oahpuide.

Go dohkkeha olgoriikka oasseoahpuid, de berre earenoamáš fuomášumi bidjat doahpagiid “normerejuvvon oahppoáigi” ja “ollesáiggioahput” geavaheapmái. Loatnakássa ja sisafárreneiseválddit geavahit dáid doahpagiid. Oppalaččat gusto ahte oahppoásahus gosa lonohallan dáhpáhuvvá lea mearridan normerejuvvon oahppoáiggi riikka lágaid ja láhkaásahusaid vuođul. Oahppočuoggá (credits) meari gáibádus njeallje jagaš bachelorgráda olaheapmái sáhttá leat iešguđetlágán oahppoásahusas oahppoásahussii seamma regiovnnas/riikkas, nu mo ovdamearkka dihtii USA:s. Go galgá rehkenastit galle oahppočuoggá (credits) ferte čađahit juohke lohkanbajis, de lea vuolggasadjin galle oahppočuoggá (credits) oahppoásahus ieš lea bidjan gráda normeremii. Ovdamearkka dihtii 120 maid juohkit jagiid lohkui ja dasto guovtti sadjái. Ovdamearka: 120 credits:4:2=15 credits. Dát juhkko guovtti sadjái go oahppoásahusain sáhttá leat nu gohčoduvvon trimesterortnet ja go Sámi allaskuvllas leat guokte lohkanbaji juohke oahppojagis.  

Oahppoásahus mii geavahuvvui ovdamearkan ovdalis sáhttá gohčodit ollesáiggeoahppun jus ovdamearkka dihte čađaha 12 credits juohke lohkanbajis. Oahppoásahusa grádastudeanttaide ii soaitte dát buktit hástalusaid, go sii sáhttet čađahit 18 credits nuppi lohkanbajis ja dáinna lágiin olahit 120 credits njealji jagis. Oassestudeanttat/lonohallanstudeanttat geat leat dušše 1-2 lohkanbaji guoskevaš oahppoásahusas fertejit váldit 15 ja 30 credits. Ávžžuhuvvo ahte dákko dahkko ovdalgihtii árvvoštallan ovdalis namuhuvvon rehketbihtá vuođul gávnnahan dihte galle credits leat doarvái juohke lohkanbadjái.

Oahppohálddahus koordinere ovdalgihtiidohkkeheami ohcamiid. Fágagoahti árvvoštallá ohcamiid fágalaččat ja buktá mearrádusárvalusa. Dutkan- ja oahppostivra mearrida ášši loahpalaččat. Mearrádus sáddejuvvo sihke studentii ja guoskevaš fágagoahtái/-gođiide.

Ovdalgihtiidohkkeheami mearrádusas galgá studentii dieđihuvvot ahte ovdalgihtiidohkkeheapmi lea gaskaboddasaš ja ahte Ioahpalaš dohkkeheapmi/sisaheiveheapmi dahkko loahpahuvvon lonohallanáigodaga maŋŋel ja dohkálaš duođaštusaid vuođul, nu mo dohkálaš diploma dahje árvosátnečállosa ja normerejuvvon oahppoáiggi ja oahpu viidodaga dieđuid vuođul.

Sámi allaskuvla ii rehkenaste olgoriikka eksámeniid árvosániid Norgga árvosátnevuogádahkii. Studentii galgá dieđihuvvot ahte lea sin iežaset ovddasvástádus iskat mo olgorikka eksámenat/árvosánit árvvoštallojuvvojit Sámi allaskuvlla sisabeassangáibádusaid ja oahpuid dohkkeheami ektui.

Olgoriikka alit oahpu dohkkeheapmi báhtareddjiide geain leat váilevaš duođaštusat

Ohccit geain lea váilevaččat duođaštuvvon alit oahppu galget earenoamáš diliin oažžut vejolašvuođa oažžut oahpusteaset árvvoštallojuvvot eará ládje. NOKUT lea pilohtaprošeavtta vuođul, masa máŋga alit oahppoásahusa serve, hábmen sierra prosedyra dákkár áššiid meannudeapmái.  Geahča  Flyktning prosedyren NOKUT:a ruovttusiidduin. Dákkár ohccit sáhttet ohcat oažžut fágalaš dohkkeheami/sisaheiveheami Norgga alit oahppoásahusain. Ohccit geat leat ožžon oppalaš dohkkeheami NOKUT:as eai sáhte árvvoštallojuvvot flyktningprosedyra vuođul.

Vástádus ohccái

Oahpuid dohkkeheami/sisaheiveheami ohcama vástádusas galget čuovvovaš dieđut leat mielde:

  • Dohkkehuvvon oahppočuoggáid oppalaš lohku
  • Vejolaš fágain/oahppoovttadagain beassamat Sámi allaskuvllas
  • Vejolaš fágalaš latnjalasvuođat Sámi allaskuvlla fágaiguin/oahppoovttadagaiguin (galle oahppočuoggá)
  • Vejolaš beassamat bargogáibádusain mat leat geatnegahtton ovdal beassá eksámenii fágain/oahppoovttadagain
  • Vejolaš lassigáibádusat/ráddjejumit/eavttut čadnon ovdalis namuhuvvon čuoggáide.

Vejolaččat berre maiddái addot čuovvovaš diehtu:

  • Guđe eksámeniid ohcci ferte čađahit ovdal lea kvalifiserejuvvon ohppui masa lea ohcan
  • Deavdá go ohcci gráda gáibádusaid, dákko bokte fágalaš viidodaga ja čiekŋudeami ektui
  • Makkár gáibádusat leat ovdal gráda sáhttá juolluduvvot Sámi allaskuvllas.

Sisaheivehanáššiid vurkkodeapmi ja registreren

Sámi allaskuvla galgá vurkkodit buot duođaštusaid mat leat relevánttat oahppoduođaštusaide, dát mearkkaša duođaštusat mat dahket oahpuid sisabeassama vuođu (oahppoduođaštusat, árvosátnečállosat, bargoduođaštusat ja eará mas lea relevánsa sisabeassama árvvoštallamii), ja maiddái duođaštusaid mat gusket olggobealde oahpuid sisaheiveheapmái ja dohkkeheapmái, ja mat addet vuođu beassat Sámi allaskuvlla eksámeniin.

Oahppohálddahus ovddasvástida olggobealde oahpuid dohkkeheami/sisaheiveheami duođaštusaid vurkkodeami. Čálalaš dohkkeheami/sisaheiveheami ohcan oktan duođaštusaiguin registrerejuvvo ja áššemeannuduvvo áššemeannudanvuogádahkii (FS:ii) ja maiddái elektrovnnalaš vuorkái.

Lea dehálaš ahte áššis ja áššenamahusas leat čuovvovaš dieđut:

  • Studeantta namma
  • Oahppobáiki
  • Oahpu namma ja viidodat
  • Vejolaš oahpposuorgi
  • Oahpu álgima ja loahpaheami jahkelohku.

Olggobealde oahpu duođaštusat, oahppoduođaštusat ja árvosátnečállosat, galget skánnejuvvot ja vurkejuvvot dokumeantavuorkái FS:s. Lassin galgá ášši registrerejuvvot godkjenningsmodulii FS:s. Elektrovnnalaš vuorkká áššenummár galgá maiddái vurkejuvvot áššái FS:ii.

Duođaštusat mat sisttisdollet sensitiiva persovdnadieđuid eai galgga vurkejuvvot FS:ii. Jus lea dárbu vurkkodit dákkár duođaštusaid, de galget dát vurkejuvvot elektrovnnalaš vuorkái, go sáhttá mearridit gii dáid beassá oaidnit.

Ohcanskovvi fágaid sisaheiveheamis/-beassamis gávdno Sámi allaskuvlla ruovttusiiddus.

Váiddameannudeapmi

Dson guhte lea áššemeannudeaddjin áššis mas lea dahkkon mearrádus, galgá fuolahit áššeoasálaččaid manná diehtu mearrádusa birra nu jođánit go vejolaš. Dán dieđus galgá maiddái dieđihuvvot váidinvejolašvuođa, váidináigemeari, váidininstánssa, váidima ovdánanvuogi ja ášši dokumeanttaid oaidnima vuoigatvuođa birra.

Dábálaččat galget váiddaáššit meannuduvvot hálddašanlága kapihtal VI Om klage og omgjøring njuolggadusaid vuođulMuhtun váiddaáššiide gávdnojit earenoamáš njuolggadusat Universitehta ja allaskuvlalágas §§ 5-2 og 5-3. Váiddaáššiid meannudeapmi lea lagabui čilgejuvvon kapihttalis 12.

 


Kvalitehtasihkkarastin:

  1. Ulbmil ja huksehus
  2. Aktevrrat ja ovddasvástádusjuohku
  3. Kvalitehtadimenšuvnnaid mihtut
  4. Evalueremat
  5. Oahppokvalitehta analysa
  6. Bargo- ja ovddasvástádusjuohku kvalitehtasihkkarastimis ja oahpuid hálddašeamis
Oahppodoaimmaid kvalitehtagiehtagirji
Filesize: 1226 KB