SÁM 193 Girječállioahppu 3 - Čállinhárjehallan

• Oahpu lágideapmi: Oahpus leat fysalaš deaivvadeamit Diehtosiiddas. Sámi allaskuvla lágida kurssa ovttasráđiid Sámi Girječálliid Servviin
• Oahpahusgiella: Davvisámegiella
• 10 oahppočuoggá
• Oahppoplána
• Diibmoplána/Deaivvadanplána: TimeEdit Samisk Høgskole - Sámi allaskuvla
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Oahppoovttadat lea oassin Girječállioahpus 1-3, mii oktiibuot dahká 30 oč. Girječállioahpus lea vejolaš váldit juohke 10 oč kurssa sierra. 

Girječállooahppu 1-3 lea jurddašuvvon olbmuide geat háliidit oahppat girječállima, ovdánahttit čáppagirjjálaš čállindáidduset ja hárjánit árvvoštallat girjjálašvuođa teavsttaid. 
Danin vuoruhuvvo čállin iešguđetge šaŋŋeriin. Oahpahus lea máŋggabealat, ja dasa bovdejuvvojit guosselogaldallit lassin kursalágideddjiide. Studeanttat galget oahpásmuvvat 
iešguđetge čállinšlájaide/ šaŋŋeriidda, ja sii besset ieža iskat čállit sihke šaŋŋerrájáid siskkobealde ja šaŋŋer-rastideaddji teavsttaid. Oahpahus lea maiddá girječállima 
giellageavaheami birra ja oahpásmuvvan sámi čállima historjái ja máŋggabealatvuhtii, ee.girjjálašvuođa ođđa almmuhanvugiide, dego slam, spoken word ja digitála girjjálašvuohta. Iešguđetge oasis oahpus deattuhuvvojit moadde čállinhámi erenoamážit.

Oahppu addá čállinhárjáneami mii lea ávkin sihke čáppa- ja fágagirjjálaš čállimii. Kurssas oahpásmuvvá iešguđetge čállinšlájaide maid sáhttet atnit ávkin sihke journalisttat, 
lágádusbargit, olbmot geat barget kulturealáhusain, girjerájusbargit ja oahpaheaddjit.

Girječállioahppu 3 čiekŋuda erenoamážit čállinhárjehallamiidda, mas studeanta beassá iskat iešguđet ge čállinhámiid, ja dasto válljet makkár šaŋŋerii dahje šaŋŋeriidda háliida 
spesialiseret. Girječállioahppu 3 giehtadallá girjjálašvuođa almmuhanvugiid ja makkár sadji girjjálašvuođas lea servodagas, ja deattuha maiddá studeanttaid máhtu ovdanbuktit iežaset čállosiid.