Sámi allaskuvlla stivra lea virgádan golbma ođđa professora
Sámi allaskuvlla stivra lea virgádan golbma ođđa professora
Sámi allaskuvlla stivra lea virgádan geassemánu čoahkkimis golbma ođđa professora. Sii leat Dr. Torkel Rasmussen, Dr. Ylva Jannok Nutti ja Dr. Hege Merete Somby.
- Dát lea stuorra fágalaš olahus min ásahussii ja iluin sávan bures boahtima dán golbmasii professorin. Sámi allaskuvla dárbbaša sin čehppodaga ja gelbbolašvuođa nannet ásahusa oahpuid ja dutkama, dadjá rektor Liv Inger Somby.
Sámi allaskuvlla stivrras lei stivračoahkkin geassemánu 12. beaivvi.
Vuosttašamanueansa Dr. Torkel Rasmussen lea virgáduvvon professorin sámi sosiolingvistihkas.
Son lea bargan Sámi allaskuvllas 2001 rájes ja lea guhká bargan journalistihka fágasuorggis journalistihkas. Maŋimuš jagiid lea Rasmussen jođihan Sámi allaskuvlla doavttergrádaprográmma sámegielas ja sámi girjjálašvuođas.
Son nákkáhalai jagis 2013 ja su doavttergráda lea giellasosiologiijas "Go ealáska, de lea váttis dápmat” Davvisámegiela etnolingvisttalaš ceavzinnávccaid guorahallan guovtti gránnjágielddas Deanus ja Ohcejogas 2000-logu álggus".
Sus lea duppal gelbbolašvuohta, sihke doavttergráda giellasuorggis ja lea jođihan journalistaoahpuid sihke bachelor- ja mastergráda dásis. Rasmussen lea juo jagis 2020 árvvoštallon ja kvalifiserejuvvon professorin.
- Mun dieđusge illudan ja háliidan giitit Sámi allaskuvllas stivrra dáinna gudnin go leat nammadan mu professorin. Bealistan jáhkán ahte sosiolingvistihka lea okta dain deháleamos dutkanbargguin sámi servodagas, beassá dutkat mo sámegielaid ealáskahttá ja sáhttá maid dutkamiin veahkehit sámi servodagaid ovdánahttit giellaealáskahttima, dadjá Rasmussen.
Guokte ođđa professora pedagogihkas
Sámi allaskuvlla stivra virgádii guoktása professorvirggiide pedagogihkas.
Vuosttašamanueansa Ylva Jannok Nutti, lea bargan Sámi allaskuvllas 2014 rájes ja bargá pedagogihka fágasuorggis. Jannok Nuttis lea stuorra fierpmádat sihke Sámis ja riikkaidgaskasaččat ja lea hárjánan bargat ja jođihit stuorra dutkanprošeavttaiguin. Lágašovttasbargu oahpaheaddjiiguin sámi skuvllain ja mánáidgárddiin lea guovddáš Jannok Nutti dutkamiin. Jannok Nutti lea ovdánahttán Sámi oahpaheaddjeoahpu ja lea bagadallan ollu masterstudeanttaid dás rájes go vuođđoskuvlaoahpaheaddjeoahput šadde masterprográmmain. Sus lea doavttergráda pedagogihkas ja nákkáhalai Luleå tekniska universitet jagis 2011.
- Lean hui ilus go Sámi allaskuvlla stivra lea mearridan fállat professorvirggi munnje. Dovddan iežan hui giitevažžan go lean beassan bargat dutkan- ja oahpahusbargguin. Lean beassan ovttasbargat oahpaheaddjiiguin, kollegaiguin, studeanttaiguin, ohppiiguin ja mánáiguin, ja ahte dát bargu leat árvvus atnon ja buriin mielain joatkkán sámi pedagogalaš dutkamiin, dadjá Jannok Nutti.
Vuosttašamanueansa Hege Merete Somby lea bargan Sámi allaskuvllas 2022 rájes. Sus lea doavttergráda pedagogihkas ja lea dan ovdal nai bargan čieža jagi Universitetet i Innlandet. Somby fágalaš givrodat lea bargat innovatiiva dásis ja mo sáhttá dutkansurggiid nannet vai leat doarjjan ja ávkin oahpahusas. Somby lea jođihan sihke dutkan ja ovddidan prošeavttaid Høgskolen i Innlandet/ Universitetet i Innlandet, mii sisttisdoallá virtuála realitehta ja lasihuvvon realitehta. Son nákkáhalai jagis 2017 ja su doavttergráda lea ávkkálašvuohta ohppiid fitnodagain "Vi gjør noe med … eller hva skal jeg si da? Vi gjør noe anna!: Elevbedrift som inkluderende arbeidsmåte for elever med særlige behov»..
- Lea stuorra gudnin meroštallojuvvot professorin Sámi allaskuvllas ja lea stuorra ovddasvástádus čadnojuvvon dakkár virgái veahkehit nannet sámi dutkama ja oahpahusa sámi perspektiivvas sámi álbmoga várás dadjá Somby.
Ovcci professora Sámi allaskuvllas
Lea vuosttaš geardde go Sámi allaskuvlla stivra oktanaga virgáda golbmasa professorin. Dál šaddet ásahusas oktiibuot ovcci professora.
Háliidan rábmot fágabirrasiid ja fágajođiheddjiid geat nu áŋgirit barget gelbbolašvuođa loktemiin. Sámi allaskuvlla mihttun lea šaddat universitehtan ja dát virgádeamit nannejit vejolašvuođaid boahttevaš logi jagis dán olahit, dadjá rektor Somby
Govas gurutbealde olgešbeallái Torkel Rasmussen, Ylva Jannok Nutti ja Hege Merete Somby
Govven: Nutti – Carl Johan Utsi; Rasmussen ja Somby – priváhta.