Oahpuid bargoviidodat ja bargonoađđi

Sámi allaskuvlla oahppodoaimmaid kvalitehtagiehtagirjji mielde lea okta oahppojahki oktiibuot 40 vahkku. Lea lunddolaš atnit vuođđun ahte ollesáiggestudeanta galgá bargat iežas oahpuin sullii 38-42 diimmu vahkkui olles oahppojagis. Dát mearkkaša ahte studeanta bargá gaskkal 1520-1680 bargodiimmu juohke oahppojagi. Jus rehkenastá ahte ollesáiggestudeanta bargá 40 diimmu vahkkui, de mearkkaša dát ahte son bargá 1600 diimmu juohke oahppojagi.

Go jurddaša ahte ovtta oahppojagis leat 60 oahppočuoggá ollesáiggestudeanttain, de mearkkaša dát ahte: 

  • 1 oahppočuoggá = birrasiid 26-27 bargodiimmu
  • 10 oahppočuoggá = birrasiid 260-270 bargodiimmu  

ECTS vuođđun lea bargoviidodat maid studeanttat fertejit atnit vuođđun vai olahit mearriduvvon oahppanjoksosiid. Vurdojuvvon bargoviidodat sáhttá dán dihte leat iešguđet lágán oahpus ohppui.

Barggut mat sáhttet leat oassin bargoviidodaga rehkenastimis:

  • Logaldallamat ja eará lágiduvvon oahpahus
  • Bagadallan
  • Joavkobarggut
  • Iešheanalaš barggut, eksámeniidda ráhkkaneamit
  • Joavkobarggut
  • Prošeaktabarggut
  • Mátkkit
  • Hárjehallan
  • Eksámenat

Lea vuordojuvvon ahte studeanttat geat leat váldon sisa ollesáiggeohppui, bidjet studeremii áiggi mii vástida olles bargovahku (birraset 38-42 diimmu). Lea dábálaš ahte studeanttain lea oasseáiggebargu, muhto lea goitge govttolaš vuordit ahte ollesáiggestudeanttat vuoruhit oahpu studerenáigge. 

Logaldallamiid bádden

Oažžut dávjá jearaldagaid das ahte lea go vejolaš báddet logaldallamiid jus studeanttain ii leat vejolašvuohta searvat geatnegahtton oahpahussii. Muhtimin lea vejolaš báddet, ja dan birra lea buoremus gulahallat oahpu koodináhtoriin. Muhto Sámi allaskuvllas ii leat vejolašvuohta álo, ja buot oahphusa báddet, e.e danin go dasa guskket persuvdnadieđuid njuolggahusat. Bádden eaktuda ahte sihke logaldallit ja buot studeanttat fertejit miehtat báddemii (geahča eanet dieđuid dan birra dáppe). 

Sámi allaskuvllas maiddái ii leat vejolašvuohta lágidit neahttaoahppun oahpuid mat leat NOKUTa bealis dohkkehuvvon lágiduvvot oahppobáikkis. Muhtin oahpuin lea oahpahanvuogit dakkárat mat gáibidit ahte studeanttat oasálasttet aktiivvalaččat oahpahussii ja oahppodoaimmaide, ja oahpuin main gáibiduvvo dohkálašvuođaárvvoštallan lea earenoamaš dehálaš ahte studeanttat jeavddalaččat servet oahpahussii.