Heivehuvvon lohkanmearri studeanttaide geain leat lohkanváttut

Norgga jietna- ja čuokkesčálagirjerádjosis (Norsk lyd- og blindeskriftsbibliotek - NLB) lea  bovden Sámi allaskuvlla ja muhtin eará oahppoásahusaid searvat prošektii man bokte heivehit lohkanmeari studeanttaide geain leat lohkanváttut.  

Odne lea studeanttain geain leat heajos oaidnu, vejolašvuohta ohcat produkšuvdnavuoigatvuohta NLB:s, mii mearkkaša ahte NLB ráhkadahttá sin lohkanmeriid omd. jietnagirjin dahje e-girjin. Studeanttain geain leat earálágán lohkanváttut, omd. dysleksiija, ADHD, konsentrašuvdnaváttisvuođat dávdda/ vahágahttima dihte dahje fysalaš doaibmahehttehusat mat dagahit ahte lea váttis lohkat girjji – sáhttet oažžut luoikkahanvuoigatvuođa NLB:s. Dat mearkkaša ahte sii sáhttet luoikkahit jietnagirjjiid mat leat juo ráhkaduvvon studeanttaid váras geain leat oaidninváttut.

Leat unnán sámegielat studeanttat geain lea produkšuvdnavuoigatvuohta, ja danin gávdno unnán sámegielat girjjálašvuohta heivehuvvon hámis NLB:s. NLB lea guhka bargan dan ovdii ahte buot studeanttaid geain leat lohkanváttut, galggašii leat produkšuvdnavuoigatvuohta. Prošeavtta bokte áigot geahččaladdat ortnega man bokte eanet studeanttat ožžot produkšuvdnarievtti. Mihttun prošeavttain leat čalmmustahttit makkár heivehandárbbuid dát mielddisbuvttášii ja man olu lassiresurssaid dát gáibidivččii NLB:s ja oahppoásahusain.

Sámi allaskuvla ohca studeanttaid geain leat lohkanváttut ja geain lea beroštupmi searvat prošektii. Prošeavtta ulbmiljoavku lea bachelorprográmma studeanttat, geain leat dokumenterejuvvon lohkanváttut. NLB lea juo produseregoahtán sámegielat jietnagirjjiid, ja mii sávvat ahte ollet olu sámegielat lohkanmeari ráhkadahttit prošeaktaáigodagas mii bistá 2022 lohppii.

Jus don leat okta dain studeanttain gii ražat lohkamiin, de sáhtát dál oažžut lohkanmeari ráhkaduvvot jietnagirjin dahje e-girjin.

Dán fertet dahkat:

Oažžun dihte lohkanmeari jietnagirjin dahje e-girjin fertet:

  • Dieđihit iežat prošektii (dieđihanáigemearri lea nohkan, muhto sáhttit árvvoštallat ain studeanttaid váldit sisa). Dan dagat e-boasta bokte oahppohálddahussii (oahppohalddahus@samas.no) , dahje váldde njuolga oktavuođa Anne Karen Hætta Balsain (annekhb@samas.no) dahje Ellen Marianne Siriin (ellenmsi@samas.no).
  • Dieđihit iežat NLB:i jus don it leat juo luoikkaheaddji. Dieđihanskovis fertet muitalit makkár lohkanváddu dus lea.

Luoikka ja guldal lohkanmeari Lydhør-appas! Luoikkaheaddjinummára ja PIN-koda oaččut go leat dieđihuvvon NLB:i.

Fuomášuhttit ahte buot luoikkaheaddjit NLB:s fertejit bivdima bokte sáhttit dokumenteret iežaset dárbbu duođaštusain fágaolbmos. Geahča eavttuid dieđiheapmái NLB:i.