Nákkosgirji dohkkehuvvo almmuheapmái

Sisaaddon nákkosgirjji ii sáhte geassit ruovttoluotta ovdal go lea loahpalaččat mearriduvvon lea go nákkosgirji bealuštan veara nákkáhallamis. Go nákkosgirji dohkkehuvvo, de studeanta oažžu dieđu dutkanhálddahusas álggahit nákkosgirjji deaddilanbarggu nákkáhallama várás. Nákkosgirji almmuhuvvo dan hámis go dat lea addojuvvon árvvoštallamii. Jus komitea lea bivdán kandidáhta divvut nákkosgirjji, de almmustahttojuvvo divvojuvvon nákkosgirji.

Erratalistu: maŋimuš meattáhusaid divvun ovdal go nákkosgirji almmuhuvvo

Nákkosgirjji sisaaddima maŋŋel ja árvvoštallankomitea cealkámuša maŋŋel sáhttá divvut dušše fal nákkosgirjji formála boasttuvuođaid ovdal go girji deaddiluvvo. Erratalistu lea formála meattáhusaid listu man studeanta sádde dutkanhálddahussii ja mas leat konkrehta divvunárvalusat formálalaš feaillaide (layout unnibuš meattáhusat, deaddilanfeaillat, gielalaš feaillat jna.). Erratalistu ii galgga leat guhkki, ja dan lea vejolaš addit sisa dušše oktii. Formálalaš feaillaid divvun mearkkaša dahkat teavstta gielalaččat riekta, muhto dán muttus ii leat šat vejolašvuohta čilget, buoridit dahje dahkat rievdadusaid teavstta sisdollui. Dás lea maid dehálaš fuomášit ahte erratalistu ii leat olles nákkosgirjji giellabassan, muhto dušše fal maŋimuš meattáhusaid divvun. Oppalaš giellabassan ja govaid, tabeallaid ja eará materiálaid ordnen ja hábmen nákkosgirjái galgá leat dahkkon ovdal go studeanta sádde nákkosgirjji árvvoštallamii (vrd. kap. 2 dán gihppagis).

Erratalisttu áigemearri sáddet dutkanhálddahussii lea guhtta vahku ovdal plánejuvvon nákkáhallama. Ávžžuhit ahte studeanta dárkkistišgoahtá sisasáddejuvvon ja vejolaččat dievasmahttojuvvon nákkosgirjji giehtačállosa juo dan botta go árvvoštallankomitea lea bargame cealkámušainis. Ná erratalistu sáhttá gárvánit dakka mannjel go árvvoštallankomitea dohkkeha nákkosgirjji deaddileapmái ja almmolaš bealušteapmái.

Jus DOS-jođiheaddji dohkkeha erratalisttu, de kandidáhtta oažžu divvut daid feaillaid nákkosgirjji giehtačállosii ja de sáddet ođđa nákkosgirjji fiilla farggamusat sisa dutkanhálddahussii. Dát ođđa fiila lohkko de nákkosgirjji loahpalaš veršuvdnan, mii prentejuvvo nákkáhallamii.

Jus árvvoštallamii addojuvvon nákkosgirjeveršuvnnas čuožžu ahte okta artihkal “lea almmuhuvvome”, de ii leat vejolaš dan divvut ja čállit ahte artihkal “lea almmuhuvvon”. Tabeallain ii oaččo divvut maidege. Mearrádus, ahte ii leat lohpi rievdadit čállosa sisdoalu, mielddisbuktá maiddái ahte kandidáhtta ii sáhte divvut artihkkala vaikko áigečála, mii áigu almmuhit artihkkala, livččii bivdán kandidáhta divvut dahje rievdadit osiid teavsttas. Jus kandidáhtta olle, de sáhttá ovdasánis čujuhit loahpalaš áigečálaartihkkalii.

Nákkosgirjji deaddileapmi

Sámi allaskuvla fállá almmuhit nákkosgirjjiid Sámi allaskuvlla doavttirgrádaráiddus. Kandidáhtta sáhttá viežžat prentenskovi Sámi allaskuvlla ruovttusiiddus, deavdit dan ja sáddet dan oktan bearbma- ja siskkošfiillaiguin dutkanráđđeaddái, gii ordne prentenskovvái dutkanhoavdda vuolláičállosa ja ISBN-nummára ja eará dieđuid siskkošfiilla kolofonsiidui.

Prentenskovvi galgá sáddejuvvot dutkanhálddahussii maŋimustá vihtta vahku ovdal nákkáhallama, vai dutkanhoavda olle dohkkehit nákkosgirji giehtačállosa ja prentehus olle prentet girjji ovdal nákkáhallama. Dutkanhálddahus máhcaha skovi kandidáhttii gii álgá ovttasbargat prentehusain. Go oažžu vuolláičállon prentenskovi ruovttoluotta hálddahusas, de dainna sáhttá diŋgot nákkosgirjjiid prentehusas. Girji galgá leat leverejuvvon Sámi allaskuvlla girjerádjosii maŋimustá guokte vahku ovdal nákkáhallama daningo láhkaásahusa § 19-2 mielde nákkosgirji galgá leat almmolaš unnimustá guokte (2) vahku ovdal nákkáhallandilálašvuođa.

Nákkosgirji prentejuvvo guovtti fiilla vuođul: bearbmafiilla ja siskkošfiilla vuođul. Sámi allaskuvla atná standardiserejuvvon bearpmaid (ovdasiidu ja maŋŋesiidu), man designii kandidáhtta ii sáhte váikkuhit. Bearbmafiila čuovvu oktasaš mála man sáhttá viežžat Sámi allaskuvlla ruovttusiiddus ja dan oažžu maŋŋil go nákkosgirjji árvvoštallanohcamuš lea hálddahuslaččat dohkkehuvvon (ja mannjel go vejolaš erratalisttu divvumušat leat dohkkehuvvon). Kandidáhtta sáhttá čállit čoahkkáigeasu bearpma maŋŋesiidui (eanemustá 1200 mearkka oktan gaskkaiguin) ja buktit kandidáhttagova (jpg/tiff/png/psd) maŋŋesiidui. Kandidáhtta ieš árvvoštallá atnágo gova bearpma maŋŋesiiddus vai ii.

Fiillat galget sáddejuvvot prentehussii guoktin pdf-fiilan. Fiillat galget hábmejuvvot A4-sturrodagas ja leat gárvvisin guovttisiidosaš prentemii. Jearaldagat deaddileami birra sáddejuvvojit dutkanhálddahussii.

Jus nákkosgirjji govain, kárttain dahje govvosiin lea vel juoga ordnet prentenkvalitehta dáfus, de sáhttá kandidáhtta  oastit prentehusa hábmejeaddjis veahki hábmet kárttáid ja eará dárbbašlaš govvosiid hálbbiduvvon haddái 350 ruvnno diimmus (plus moms), ja dasa sáhttá atnit iežas annuma dahje ohcat NSI-doarjaga, jus studeanta lea Sámi allaskuvlla virggis. Sámi allaskuvla vállje dán bálvalusa hábmejeaddji  kandidáhttii ja máksá loahpa (bajábealde 350 ruvnno). Vai nákkosgirjji prentenmuttus ii dárbbaš šat ordnet govva- ja kártamateriála ded., de ávžžuhit ahte studeanta fuolaha juo ovdal go sádde nákkosgirjji árvvoštallamii, ahte buot materiálain lea dákkár kvalitehta mii dohkke prentemii maiddái.

Sámi allaskuvla gokčá nákkosgirjji 70 gáhppálaga deaddileami. Dán 70 gáhppálagas addojuvvojit Sámi allaskuvlla girjerádjosii 12 gáhppálaga, main čieža (7) girjji sáddejuvvojit Nationála girjerádjosii, ja kandidáhttii addojit 10 nákkosgirjji. Jus studeanta háliida diŋgot liigegáhppálagaid nákkosgirjjis iežas atnui, de son sáhttá diŋgot daid mávssu ovddas prentehusas.

Nákkosgirjji almmuheapmi girjin ja digitála hámis Bibsys Brages

Láhkaásahusa § 19-2 mielde nákkosgirji galgá leat almmolaš maŋimustá guokte (2) vahku ovdal dan almmolaš bealušteami (nákkáhallandilálašvuođa), ja danin bealli 48 gáhppálagas maid Sámi allaskuvla deaddila, biddjojit juohkinláhkai guokte vahku ovdal nákkáhallama ja nubbi bealli (24 gáhppálaga) biddjojit juohkinláhkai nákkáhallansále olggobeallái dan beaivvi go nákkáhallandilálašvuohta lea.  Maŋimustá guokte vahku ovdal nákkáhallandilálašvuođa rahppo maiddái liŋka nákkosgirjji digitála veršuvdnii.

Sámi allaskuvlla girjerájus ja/dahje dutkanhálddahus sáhttá veahkehit doavttirgrádastudeantta almmuhit nákkosgirjji maiddái rabas neahtas Bibsys Brages. Nákkosgirji oažžu ná bistevaš neahttačujuhusa, man sáhttá atnit ee. nákkáhalli boahtteáiggi almmuhemiin ja diehtojuohkimiin. Sámi allaskuvlla ruovttusiidui biddjo maid njuolggoliŋka nákkosgirjái, vai nákkosgirji lea lohkan láhkai juo ovdal nákkáhallama.

Láhkaásahusa § 19-2 mielde nákkosgirji galgá leat almmolaš unnimustá guokte (2) vahku ovdal dan almmolaš bealušteami (nákkáhallandilálašvuođa), de maiddái nákkosgirjji digitála liŋka rahppojuvvo unnimustá guokte vahku ovdal nákkáhallama.